बृहत्तर बराहक्षेत्र विकास समिति

बृहत्तर बराहक्षेत्र धार्मिक, ऐतिहासिक, सांस्कृतिक र प्राकृतिक दृष्टिले समृद्ध पूर्वी नेपालको एक महत्वपूर्ण तीर्थक्षेत्र हो। यहाँ बराहक्षेत्र धाम, चतरा धाम, औलिया बाबा धाम, कोका–सप्तकोशी संगम र रामधुनी धामलगायत थुप्रै धार्मिक क्षेत्रहरू रहेका छन्, जहाँ वर्षभरि हजारौं भक्तजनहरूको आवागमन हुने गर्दछ।

बृहत्तर बराहक्षेत्र भन्नाले भगवान् श्री विष्णुले वराह रूपमा अवतार लिई दैत्यराज हिरण्याक्षबाट पृथ्वीको उद्धार गरिसकेपछि जुन स्थानमा निवास गर्नुभयो र आफ्ना विभिन्न अलौकिक लीलाहरू रचना गर्नुभयो, तिनै पवित्र क्षेत्रहरूको समष्टिगत स्वरूपलाई बुझाउँछ। विभिन्न शास्त्रीय मान्यता र पौराणिक वर्णन अनुसार यस पवित्र क्षेत्रको परिधि ८४ कोषको क्षेत्रफलमा फैलिएको छ।

नेपालको प्रसिद्ध चार धाममध्येको एक मुख्य बराहक्षेत्र धाम सुनसरी जिल्लाको बराहक्षेत्र नगरपालिकामा अवस्थित छ। तथापि, बृहत्तर बराहक्षेत्रले बराहक्षेत्र धामको आसपासमा रहेका अन्य छिमेकी जिल्ला र नगरपालिकाहरूका ऐतिहासिक एवं धार्मिक क्षेत्रहरूलाई समेत समेट्दछ। खासगरी पूर्वी नेपालका तीनवटा परिपूरक जिल्लाहरू सुनसरी, उदयपुर र धनकुटाका विभिन्न क्षेत्रहरू यस बृहत्तर बराहक्षेत्रको परिधिभित्र पर्दछन्।